Bloggu litterariu corsu

u 2ndu d'Aprile 2013 - scrittu dà - lettu 213 volte

Vennari Santu


Vennari Santu
Antonu viaghjaia. Un era par tradizioni o nustalgia ne mancu par manifistà à so fedi prufonda. No. Viaghjaia parchi a sapia, ch’era un bon ghjornu par viaghjà. Ben intensu a città facia neci d’essa cristiana, ma à Antonu un li faciani nudda sti muvimenti diversi, sparsi e sfarenti di la ghjenti. Eddu viaghjaia, parchi l’aviani sempri piaciuti sti trè ghjorni prim’à Pasqua. Un sapia parchi, ma sapia ch’eddu duvia viaghjà, cussi, solu – l’avia sempri impiutu di gioia d’essa solu à mezzu à la ghjenti, à mezzu à tutti quiddi chi s’erani mossi. L’uni mascarati, parchi erani cunfrati e chi un cunfratu senza capucciu un n’a nissun sensu, l’altri in bellezza…inc’i parmanenti atroci di a vigilia e i beddi panni d’a duminica, l’altri vistuti comu si s’erani svigliati à mumentu e chi pariani sempri puzzà à so bruta notti e u so ciarbeddu mischinu. Uni pochi pricavani – erani rari d’altrondi, d’altri faciani i conti d’a prussima alizzioni, d’altri a si circaiani una donna, o un masciu, tuttu dipindia d’u sessu primariu o sicundariu d’altrondi, chi avali che no erami avali, tuttu era pussibuli. Un pucareddu di briachi erani qui à mezzu, ch’aviani cunfundutu a prucissio e a festa d’a canaglia, e si vidiani ancu una mansa di stranieri vinuti à veda, à veda chi ?, un a sapiani mancu, ma c’erani, à u so postu di turistu ufficiali e internaziunalmenti ricunnisciutu, incu tutti i mezzi muderni di cummunicazioni pussibuli, à fà creda chi a prucissio era un salonu di vendità e di prumuzioni di l’ughjetti i più ricenti surtiti di l’usini di a ticnulugia a più attuali. Di tuttu què Antonu si n’infutia, Antonu, eddu, viaghjaia.
U ritu l’era vinutu quandu t’aviu trentacinqui o quarantanni, un a sapia più. Un circaia tantu à sapè chi pona si dumandi nutuli un li vinia mai à menti. Antonu avia vivutu. A quatordicianni avia lacatu à a scola e avia travaddatu, prima n’a so famidda, e dopu s’era ingaghjatu. Uni pochi di tecnichi l’avia amparatu, e po era turratu in paiesi pà serva si di u so novu sapè. Sin’era sirvutu ancu bè e era divintatu cunnisciutu. Ma un circaia a gloria, e quand’avia capitu chi l’affari erani morti, s’era ritiratu pianu pianu pà un avè storii. A principiu, comu t’avia uni pochi di soldi, essendu ritiratu di l’armata, avia solamenti campatu di notti. Era duvintatu una stutuzioni n’u mondu di nuttambuli, chi cantaia – e ancu propiu bè, bivia –ma senza esgiazerazioni comu a dumandaiani i leghji d’u paiesi chi dumaia u soiu, e subratuttu ghjucaia, incu finezza e arti, cio chi facia d’eddu una parsonna ricercata in i partiti sicreti chi si faciani in calchi lochi chi solu un veru ghjucatori po cunnoscia. C’erani uni pochi di tipi chi si diciani i so amichi, ma eddu era finu e un si lacaia piddà à sti maneri di bugiardi e di latri chi so a virità di a notti. Tinia u so postu, fendu si rispittà, ma senza muscià lu troppu, chi sapia chi tutti i minuti erani priculosi, e soca, era sta rialità qui, chi li garbaia. 
E po, avia cambiatu di versu. Un era più surtitu, ma à u cuntrariu avia presu l’abitudina di sviglià si à l’ora bona, versu cinqu’ori ogni matina, e avia sceltu di travaddà, senza dumandà troppu – purtaia i ghjurnali e dopu campaia n’a so casa, inc’uni pochi di libbri e una musica bona par senta à passà l’ori. Un andaghjia più n’i bari, ma avia dicisu, senza troppu pona si dumandi nutuli, d’andà una volta à l’annu à viaghjà pà u Vennari Santu. E faciani parecchji annati chi i so paisani aviani capitu chi, for di a festa di San Larenzu, e di u Vennari Santu, tutta l’annata d’Antonu un era ch’un sicretu maiori, una assenza tutali par rapportu à u corsu di i purcarii d’u mondu.
L’aviani capita, i so paisani, l’aviani capita parchi aviani a paura. O tamanta paura ! Eddi, I vigliacchi, i storti, i bugiardi, a sintiani bè ch’Antonu un era d’u so mondu. Aviani circatu à ramintàlu u so passatu, à fà lu entra n’i so cumbriculi e i so vezzi bruti, ma Antonu, d’un sgardu e d’un surrisu, l’avia mandati tutti à pascia. E un aviani più insistutu, mà l’odiu, a ghjilusia, u disprezzzu e tant’affari simuli aviani impiutu a menti, u cori, u corpu e u culu di tutti i so paisani. Antonu a sapia, ma li pisciaia adossu, mintalmenti ben intesu, ancu si, di tantu in tantu, arrutaia u so stilettu e pulisciia a so pistola. Ma sta sera, Antonu era suddesfu, parchi era u ghjornu beddu par eddu,ch’era ghjornu di viaghju.
Stu viaghjà li piacia. U fretu, l’acqua, u ventu, tuttu era d’armunia inc’a vecchja cridenza, e i so passi, i gustaia, ascultendu u toccu di i so calcagni annant’à u catramu di i stradi e di i stretti d’a vecchja città. Parchi era musicanti circaia, par accupà si à renda l’ora ancora più bedda, à distunà par rapportu à u cantu d’u Perdonu e u trostu di i cateni d’u penitenti, ch’a si sudaia i so piccati. Piccatori, Antonu, un si vidia, avia fattu uni pochi di cosi chi a murali e a ghjustizia statali so capaci à cundannà, ma piccatori un si vidia, chi cridia à a vita, sapia quant’à vita è un donu misteriosu, e chi caccià una vita è una disgrazia, ben intensu, ma dino una nicissità, quand’è l’ora. E dunqua viaghjaia senza pinsà à i discorsi, à i prigheri, viaghjaia simpliciamenti, parchi era un omu chi avia u so da fà, e u so da fà era di viaghjà, à mezz’à sta ghjenti, sta sera.
E tuttu viaghjendu, amusendu si à distunà par rapportu à u trostu d’u penitenti, Antonu pinsaia. Pinsaia à u so amori, pinsaia à quidda chi li facia gustà non solamenti u piacè di campà, mà u muscu d’a so peddi e di a so natura. Pinsaia chi avia ricivutu senza dumandà nienti, un rigalu tamantu chi impiia i so ghjorna, e daghjia una prufundezza à tutt’i cosi chi staghjiani à l’ingiru. Pinsaia chi u mondu avia i so raghjona, ma chi a sola raghjona era quidda di l’omu libaru, cuscienti di sè, e cuscienti dino chi à virità d’a vita si leghja drentu à l’unmischiàsi di i falsità suciali. Tinia n’a so bunetta, a so pistola, e un era par senta si un omu, u so ciarbeddu li bastaia, ma parchi sta sera avia dicisu di fà calcosa.
Facia un pezzu ch’eddu avia matriculatu u fattu. Facia uni pochi d’annati ch’avia dicisu di rigulà un affari a sera d’u viaghju. E sta sera qui, era dicisu à rializà u colpu, parchi n’avia una tichja d’aspittà, e sapia binissimu chi l’affari lunghi duventani sarpi, ed’eddu, ch’un era una femina, i sarpi un li cunviniani. Allora era prontu e aspittaia à a fini d’u so viaghjà par andà à fà u so da fà. Un a facia pà pruvucazioni, un a facia pà ideulugia, a facia parchi c’era bisognu à fà la, par eddu, comu s’era statu chjamatu d’a una putenza suprana, un versu naturali o cosmicu, un a sapia, sta forza eterna chi voli chi d’un mali nasci un bè, e d’a morti una vita et d’una vita una morti.
E cussi chi, quandu l’ultimu cuplettu di u Perdonnu fu prununciatu in a ghjesgia bughja bughja, Antonu surti a so pistola davant’à l’altari maestru, e si tiro una badda sola in bocca, pà salutà u mondu e fistighjà, à a so manera, à morti di l’universu, e l’ aspittera d’u so rinnovu.
 


              



Dà leghje dinù

Heure H comme Haine - 10/10/2017

Haro sur la miss - 22/09/2017

Panique - 05/04/2017

Cœur de pierre - 12/03/2017

L'esprit des lois - 02/08/2016

Gordon Evans - 20/06/2016

Triptyque - 26/05/2016

Alice - 31/03/2016

Alep I love you - 18/09/2015

Je l'ai connu - 29/05/2015

Ponte Novu - 15/05/2015

1981 - 18/03/2015

Section 84 - 10/12/2014

​Armistice - 14/11/2014

Le passant - 25/10/2014

Ponte Novu - 17/10/2014

Le demi-pas - 23/09/2014

Mada et Veè - 05/09/2014

Neptudi - 24/07/2014

Commis d'office - 21/06/2014

Ultime étreinte - 16/06/2014

La Fée verte - 14/06/2014

Le sniper - 26/05/2014

Amour explosé - 20/04/2014

La mort de mon père - 02/04/2014

Ursule Dupont - 01/04/2014

1 2 3

Negru | Rossu | Biancu | Ghjallu | Critica | Feuilleton




Anima Cappiata !

Torna altri rumpistacchi chì ci impuzzicanu incù i so testi, vulendu propiu esse letti per sperà ottene una qualunque gloria ch'elli ùn anu micca in a so vita viota è senza intaressu. Bon... forze chì ghje vera. Ma ci n'impippimu. È pò, a mi diciarete, bloghi litterarii, nant'à a tela, è sopra tuttu nant'à a tela corsa, ci n'hè ghjà à buzzeffa ! Tanti scrivanetti pumposi ! È bè tantu peghju ! O tantu megliu ! Hè solu una vitrina di più per fà scopre qualchi testi scritti, senza pritenzione, incù u core, incù e trippe, o incù e viscere chì vi cunveneranu...