Bloggu litterariu corsu

u 1mu d'Aprile 2014 - scrittu dà - lettu 239 volte

Ursule Dupont

« I guai di a pignata, ùn li cunnosci cà a cuchjara. »


Dupont si chjamava, Ursule Dupont. Stu ghjornu quì era u più beddu di a so vita. S’edda ùn era a Mamma malata è cundannata, tuttu era pà u megliu.
Iè, fatta, era fatta : era statu alettu capipartitu di "Francia Par Sempri" è si n’andava in fini in cerca di a piazza chì u facia sunnià dipoi a so intrata in pulitica : Merri di a Capitali è forsi più tardi, Prisidenti di a Ripublica… Chì sà ?

I so idei erani guasgi spartuti da tutti l’abitenti di u paesi. L’insicurità si maiurava da un mesi à l’altru è l’aghjenti dumandavani aletti forti è pulizzeri in quantità.
Eddu chì era sicuru chì à un Statu forti, li tuccava d’essa rispittatu, ancu par via di i ghjandarmi è di l’armata, si campava.

A campagna interna à u so partitu era stata dura ma avia riisciutu à cunvincia i so cumpagni appughjendu annant’à quattru temi chì li tiniani à spiritu :
- A so anistità à eddu, chì l’altri pulitichenti erani - à parè soiu - sottu à l’impresa di i banditi è, di più, incapaci !
- A so capacità à rimetta in baddu un’acunumia assuffucata da sti stranieri ghjunti in paesi da piglià pani è midicini à l’aghjenti di u locu.
- A so vuluntà di metta sti Cursacci in faccia à a virità soia : ch’erani d’una sottu razza è li tuccava di rispittà a mani chì li dava u so magnà d’ogni ghjornu par carità dipoi più di trè seculi.
- A so guasgi ussissioni di rimetta a famiglia è u travagliu com’à culonni da sustena a Ripublica di dumani.
A sapia, t’avia a raghjò ! A prova, a maiò parti di a pupulazioni a si pinsava com’à eddu.

A so gioia, a spartia cù a moglia, bedda ch’ùn paria vera ma, à ciò chì si sintia ancu da a so bocca, poca astuta. Ziteddi ùn ni vuliani ancu ch’era tropu tostu, o tropu tardi.
U so cumbattu era pà u mumentu u so solu distinu, u scopu d’una vita. Ci vulia di ristabiliscia l’ordini !
Dunqua, fendu cena cù a maravigliosa moglia chì u fighjulava com’à s’eddu fussi u solu omu di a nostra Tarra, era aguantatu da l’imuzioni.
Spirà, chì spirà di più s’eddi ùn erani sti posti impurtenti chì u chjamavani com’à privistu da tant’anni ?

A cena era di qualità suprana è u sguardu di a so cumpagna li parlava dighjà di a notti à vena. Li firmava solu da pinsà à u so discorsu di u lindumani, davant’à u partitu soiu. Li tuccava à metta ci tutta a so forza è cundannà cun viulenza ciò chì s’era passatu in Corsica a sera nanzu à a so alizzioni. Sti primati, sti figlioli di scimii africani aviani fattu splusà dui bastimenti militarii ! Chì vargogna ! Si cumbattiani à quiddi chì l’aviani purtatu u prugressu, u mudirnisimu, a civilisazioni !
A sunaria di u tileffunu u cacciò da u so pinsamentu.
- Mammata ti voli veda subbitu, dissi Marie-Chantal, ti portu u to custumu grisgiu.

Viaghjendu à ciarbeddu cù a so vittura spurtiva, francò à spiccera da un cantu à l’altru tutta a capitali è si piantò ind’u parcu di u spidali duv’edda l’aspittava a Mamma chì era par mora. Saltendu i scali à quattru à quattru, ghjunsi in camara.
Era ora, o era l’ora. A so brava Mamma si spignia pianu pianu, fiera di u so figliolu ch’edda avia sustinutu sempri, discreta.

- Mi tocca à dì ti calcosa, dissi, mi tocca à dì la nanzu di cuddà à riveda à Babbitu è à u nostru Signori. Ch’eddu mi pardoni… s’ùn t’aghju mai dettu a virità.

Ursule si sintì mali. Era angusciosu è inchietu di cunnoscia stu sicretu... tantu è più ch’eddu si pusò nant’à a carrega accant’à u lettu di a so ghjinitrici.

- Senti, o figliolu caru… (si piantava chì u soffiu li mancava), senti à mè. Ti tengu più cà caru, a sai ?
- Iè chì a socu, o Mà, ma chì ci hè, chì mi voli dì ? Riposa ti, alè, mi parlarè dumani.
- Dumani, ùn ci saraghju più ! Ascolta… Ti tengu caru ma ùn sè micca u me figliolu naturali. Mi capisci ? T’aghju pigliatu à u spidali quand’edda hè morta a to mamma. Erami in viaghju è u distinu m’hà missu nant à a to strada. Eru cascata è u to tintu di… Babbitu m’avia purtatu da fà mi curà. T’avìu pocu nudda ma tandu, t’aghju vistu è u Duttori m’hà spiicatu ch’eri urfagnu. Cù i nostri rilazioni, emi fattu prestu di piglià ti cù noscu è t’avemi ricunnisciutu. Hè cusì chì tù sè divintatu u nostru figliolu amatu.

À Ursule, li paria d’avè pigliatu u mondu nant’à u capu. Subbitu subbitu li vensi una dumanda à bocca :

- Di quali ni socu, dì mi la ?
- À i to parenti, ùn ni cunnoscu cà a casata… Pardiusantù mi pari.
- Chì sai di mè, o mà… dì mi calcosa, induva eri quandu tù m’ai trovu ?
- Erami in Corsica pà i nostri nozzi, ma cunnoscu dinò u to veru nomi : Orsù Antonì, ma a me prununcia ùn hè b…

Ùn avia più fiatu. U silenziu pigliò piazza appruntendu u viaghju. Si n’andò a cara vichjetta lascendu si à Ursule sfattu, tarrurizatu è solu.
Stu ghjornu era u più beddu di a so vita ed eccu ch’eddu divintia un sunniacciu.

L’intarru fù di qualità è tutta a ghjenti di a pulitica, a ghjenti impurtenti di u paesi sanu, era ghjunta da fà i so parti à Ursule chì firmava zittu, solu cù i so pinseri. Di quali po saraghju, pinsava l’omu, ùn possu essa di sta razzaccia d’andacciani mancu capaci di campà in stu mondu maravigliosu duv’eddu si pò arrichiscia ugnunu?

Erami l’ottu di maghju di l’annata 2119.

U novi, dopu avè mandatu a moglia in viaghju ind’a cità nova sottu vetru di "Terre Adélie di l’Antarticu Club", si n’andò, malgratu i risichi di bomba, nant’à l’isula chì l’avia vistu nascia : a Corsica. Ùn avia dettu nudda à nimu.

L’avviò si pusò un’ora dopu avè pigliatu u so volu. Sbarcò po fù presu da l’adori chì l’invadia u ciarbeddu. L’aghjenti lucali, edda, s’assumigliava à quidda di a capitali è, s’eddu ùn era un accentu marcatu assai, certi di sti scimii s’assumigliavani… à eddu ! Capibruni è peddumbrosi…

Appena sbarcatu, pigliò a via di u spidali ricirchendu l’archivi di l’annu 2069, cinquanta anni fà. Era scrittu à a paghjina di u 10 di maghju ch’era natu un certu Orsu Antoni da Petru Maria Pardiusantu, dettu Lotta, mortu l’8 di maghju di a stessa annata, è di Matalena Mancini morta parturiendu. L’affari era vera, Mamma ùn burlava… è parchì avaria burlatu nanzu di mora ? U capu pisiu, Ursule, o Orsu Antoni, spassighjò par sti carrughji scunnisciuti… com’à persu. Eddu, un Cursacciu ! Ùn vidia mancu più u mondu tuttu intornu chì u soiu, u s’avia pigliatu in piena faccia. Tutti i so cirtezzi, tutta a so rabbia contru à stu sottupopulu, contru à… eddu !

Ùn si chjinò mancu passendu a nuttata annant’à un bancu duva s’era addurmintatu, accantu à eddu, un vechju cù a barba bianca. À u pisà di soli, ricuddò à u spidali par dumandà ni di più.

U Dirittori li dò di a so propia mani una copia di l’attu è u ringraziò di u so militintisimu ghjustu è sanu. Si chjamava anch’eddu Dupont è li facia piacè di riceva un cumpatriottu di sta qualità, chì nant’à l’isula, ùn c’era cà salvatichi è chì, s’ùn era pà u soli, saria d’un pezzu ch’eddu si ni saria andatu. Ursule guardò l’attu in cerca d’un rinsignamentu è u truvò : i so ghjinitori campavani ind’un locu chjamatu Mora, in l’internu di l’isula. Rinsignamenti presi, si pigliò una vittura in lucazioni è, aiutatu da una carta stradali, si mossi versu… u so paesi.

Più si viaghjava à mezu a natura salvatica è muntagnola, più Ursule si sfassava davantu à Orsu Antoni. Com’edda era luntana a so vita d’arimani.

Toccu u paesi, piuttostu u paisucciu, si piantò intarrughendu a prima parsona ch’eddu vidi : un ghjuvanottu ochjilucenti, vistutu à la paisana.

- Cunnosci a famiglia Pardiusantù ?
À u chjucu, li scappò a risa.

- Pardiusantù, quì, ùn ci n’hè ! Forsi circheti à a famiglia Pardiusàntu, nò ? Ma diti mi ghjà, chì li vuleti à sti Pardiusantù ?
- Chì ti pò fà à tè, risposi Ursule, chì cerchi, voli ch’e ti paghi ?
- Tiniti i vostri soldi, o pinzutò, eu ùn socu un vagabondu ! Tireti vi dui passi in altrò ! dissi u chjucu vultendu u spinu.

- Ùn ti vuliu disprizzà, dissi Ursule ch’ùn capia più tantu, mi paria à i to vistiti ch’avii bisognu…
- Bisognu ùn ni aghju, solu quiddu d’avè a Libartà di campà à modu meu ! È par rinsignà vi parpena, mi chjamu Orsu, Orsu Pardiusantu. Bon viaghju !

A suspresa fù tamanta. Ursule t’avia in faccia à eddu forsi un parenti.

- Aspetta mi, ti vogliu parlà di a to famiglia… è di a mea…
- Ma di quali ni seti, seti puri Francesi, nò ?
- Ùn la socu mancu più, aghju bisognu eu… d’aiutu.

Li scappò a lacrima ch’ùn era mai surtita sin’ad avà. Iè, piignia anch’eddu, com’à un ziteddu persu ind’i so propii suffrenzi, ind’i so propii cuntradizzioni.

- Viniti ind’è mè chì v’aspetta un caffè.

A casa era chjuca ma ben tinuta. A Mamma po u babbu s’affacconi salutendu è Ursule, ch’ùn l’era dighjà guasgi più, cuntò ciò chì l’accadia, ma senza palisà ch’eddu era eddu u figliolu di stu stalvatoghju. Dissi ch’eddu era unu di a famiglia di l’omu dettu Lotta.
U babbu, firmatu zittu è mutu, rumpì u silenziu.

- Petru Maria era me ziu. Era cugnumatu Lotta parchì si battia sempri contr’à quiddi suldatacci francesi chì c’impidiscini, ancu oghji, di campà com’edda ci pari ! Hè mortu l’ottu di maghju di u 2069, mentri a cummimurazioni diffesa di a battaglia di u Ponti Novu, chì si passò trè centu anni nanzu. L’armata francesa hà tiratu da risponda à quachì pitrata. A so moglia era stata firita è si n’hè morta à u spidali d’Aghjacciu dui ghjorni dopu. À ciò chì si dici in famiglia, era natu un masciu, ma quandu semi falati à circà lu, era sparitu. Nimu hà sappiutu ciò chì l’era accadutu.
- Stu ziteddu, socu eu ! briunò Orsu Antoni.

Ugnunu firmò à bocca spalancata. Tutti si pisoni è, mentri ch’eddi si basgiavani, intrì un paisanu di a vicinata.

- Chì si passa quì, hè natu un Rè ? Ma, scuprendu u visu di u furisteru, rinculò u tippu caccendu una pistola.
- Chì faci, sè scimitu o chì ? Hè me cuginu, u figliolu di Lotta !
- Ùn hè di i nostri, u ricunnoscu, hè Ursule Dupont di “Francia Par Sempri”, u nostru più gran nimicu ! Hè guasgi Merri di Parighji ! Lascia mi tumbà stu pinzutacciu, ch’edda sia vindicata a nostra ghjenti !
- Sè ind’è mè sè, è quistu hè me parenti ! Sì tù mi rispetti, dà mi sta pistola è lascia lu ch’eddu si spiechi.

Ciò chì fù fattu. U vicinu, pocu cunvintu ma rispittosu, si n’andò annunziendu à tutti a visita di u prussimu Merri di a Capitali. Tandu, s’adduniani l’aghjenti di u paesi davantu à a casa di i Pardiusantu. Tuttu u mondu vulia veda stu stranu parsunaghju, stu pinzutu figliolu di Lotta, l’aroi di u cantoni.
Trimava Ursule ch’ùn s’era mai fattu braccà ma, degnu, circava d’ùn mustrà a so paura à sta ghjenti curiosa.
À l’infora, vinsi a so pauraccia è s’adrizzò à a paisania.

- Diti mi ciò chì vo vuleti pà u vostru paesi è, a vi ghjurgu, faraghju calcosa d’impurtenti da renda vi più filici.

I risposti funi diversi : à chì u vulia sempri tumbà, à chì u vulia da Ghjinirali ! A discursata era cunfusa è u nostru pinzutu ùn ci capia un’acca ! Quali era sta pupulazioni chì fighjulava sempri in daretu, chì fistighjava o cummimurava cosi chì s’erani passati tanti seculi scorsi ? Comu pinsava sta ghjenti, chì rivindicavani ?
À chì dumandava di salvà un parlà ch`ùn era mancu capitu da l’Amiricani, à chì vulia sviluppà un’agricultura ch’ùn pudia fà binifizii, à chì vulia una strada, à chì ùn la vulia, si parlava di prugressu ma senza u mudirnisimu, ci vulia l’usini ma senza pulluzioni… È puri, sti detti si tiniani. Stu populu avia bisognu d’un ghjestu, d’una mani tesa, forsi di scusi. Quant’erani i Corsi sacrificati da salvà a Francia ? Quali era chì l’avia biutata, st’isula, di i so forzi vivi ? Quali era ch’avia missu l’assistenza da supranà u travagliu è mantinutu l’aletti incapaci à u più altu niveddu ? Iè, ci era calcosa di ghjustu ind’i discorsi, ancu s’eddi ùn la pudiani sprima di manera chjara i paisani.

Ind’u so più prufondu essa, Ursule era toccu. Li firmava avà ad ammintà a cuntradizzioni cù l’idei ch’eddu sprimava dipoi più di trent’anni. U paradossu ùn era minori ! Li ni vensi una pena in capu tamanta. Li paria ch’eddu si spiccava da u so corpu u so ciarbeddu, da divintà, cù una viulenza tarribuli, una parti di sta Tarra. Pirdia u sensu.
Fù u mumentu sceltu da Orsu, u ghjuvanottu, da purtà un rigalu à u cuginu : una scatulaccia di legnu chì cuntinia una pistola vechja.

- Era quidda di Babbitu, è sì tù mi voli renda un sirviziu, ùn ai cà tumbà u Prisidenti !

Tuttu u paesi si missi à rida è Ursul… Orsu Antoni, dopu avè salutatu à tutti, ricuddò ind’a so vittura. Era abbambanatu, guasgi briacu. Appena appusatu, sintì una sirena stridenta chì s’avvicinava. A ghjenti di u paesi, presa da a paura, scappò à dritta è a manca.
U paesi era sottu sopra. A vittura fù accinta da l’omi di i forzi di l’ordini, armati da fà a guerra. U sceffu chì paria cuntentu dissi, fendu un salutu militariu :

- Monsieur Dupont, tutta a Francia vi cerca ! Aviami a paura di truvà vi mortu !
- Riintrimi, risposi Orsu Antoni, è ùn diti nudda à nimu, diti ch’eru in viaghju da sminticà i me guai.

Strada facendu, un pulizzeru ùn si piantava più di filicità à Ursule quantu à i so pusizioni in pettu à a viulenza isulana, à sti scimii africani ch’ùn erani boni da nudda, dicendu ch’eddu saria ora di sbarrazzà a pianetta di sta gattiva razza ma chì l’ordini ùn era mai datu da i Guverni traditori…
Ursule s’era addurmintatu annant’à a panchetta. Dorma, dorma da scurdà si di stu ghjornu.

Ghjuntu in Parighji, t’avia dicisu d’ùn micca sparta u so sicretu, mancu cù a moglia. Feci a so campagna lascendu quantunqua un pocu tranquiddi i Corsi, è fù, com’edda era privista, alettu Merri di a Capitali.
Era appena cambiatu, sopratuttu ind’i so litturi. Dipoi u so sughjornu nant’à l’isula, si lighjia parechji libri chì trattavani di a so storia : A rivolta Corsa, A battaglia di u Ponti Novu, U maceddu di u 2069, eccetera, eccetera.
Quand’edda si stunava a moglia di i so sughjetti di littura, dicia chì, quand’eddu saria Prisidenti, tuccaria à eddu di truvà una suluzioni à sta crisa ch’ùn finiscia più.

Ind’u so capu, tuttu era bulicatu. S’avaria vulsutu lascià à Orsu Antoni Pardiusantu in Corsica ma, ancu sì Ursule pigliava a suprana, l’altru era sempri prisenti.

A notti, facia sempri u listessu è gattivu sonniu facia : era à caccia ind’a machja Muresca (eddu ch’ùn avia mai tinutu un fucili di a so vita) è tumbava un cignali. Quand’eddu s’affaccava da piglià a bestia, quista si mutava omu, è micca un omu scunnisciutu, t’avia u so propiu visu ! Si svigliava ogni volta mughjendu è ind’un bagnu di sudori. Dopu, ùn ci era più manera di dorma è a nuttata si passava cusì, u Merri di a Capitali agrunchjatu ind’un scornu di u so lettu, solu. A moglia, scumudata, s’era chjosa dipoi parechji mesi ind’un’antra stanza di a casa maiori.

Com’edda paria luntana, a vita d’arimani.

U ghjornu, s’andava di successu in successu in pulitica è u so Partitu, divintatu u più grandi di u paesi, li dumandò di prisintà si à l’alizzioni tanta bramata. Accittò chì ni sunniava dipoi sempri è si lampò cun rabbia ind’a campagna, scurdendu si di tuttu u restu.

U populu francesi u purtò longu à a campagna è fù senza suspresa ch’eddu fù alettu, un annu dopu, Prisidenti di a Ripublica. Eddu, u figliolu d’una scimia africana, Ursule Dupont, un Cursacciu o un pinzutacciu ? Figliolu di Georges Dupont è di Marie de Foucambert, o figliolu di Lotta è di Matalena ? Figliolu… ancu a parodda ùn avia più sensu. Ci vulia à fughja, fughja sti pinseri, fughja stu gattivu sonniu ch’eddu rifacia ogni notti dipoi u so viaghju in Mora. Fughja sta pena in capu forta assai, talmenti chì li paria d’avè u ciarbeddu in focu, com’à s’edda u francava una padda calda.

Fà, ùn si fessi stu ghjornu a pruclamazioni chì Ursule si n’andò ind’u comà.
Quand’eddu si svigliò, trè ghjorni dopu, era capichjaru. A pena in capu era stanciata è, malgratu trè ghjorni sani à caccighjà u cignali in l’alti muntagni, si sintia forti è in piena saluta.

U riposu compiu, si truvò, in fini, in forza d’assuma a Prisidenza. Li tuccava di fà un’affaccata à a tilivisiò, nant’à u prima canali, u prifiritu di i Francesi postu ch’eddu era spicializata ind’i prugrammi chjamati "Rialità" ch’ùn erani cà bucii da addurmintà i populi. Ma quista, a sapia. À chì dormi ùn si rivolta.

Dui ghjurnalisti erani prisenti u ghjornu sceltu è Ursule cunniscia, com’à sempri, tutti i dumandi chì diviani essa fatti. Ci n’era annant’à a so saluta, a pulitica di u paesi à u niveddu di l’insicurità, l’acunumia, l’aducazioni, ecc. Tuttu era prontu è priparatu è l’intarvista, l’avia dicisa cusì, si facia ind’u so scagnu, in casa soia.

Dopu à i priliminarii è qualchì dumanda ghjinirali, u ghjurnalistu feci quidda aspittata da tutti chì, annant’à l’isula, l’affari erani com’à sempri, in Francesi.

- Monsieur Dupont, avà chì seti Prisidenti di a Francia, ch’aveti da fà da rigulà i prublemi chì s’impighjuriscini in Corsica ? Aveti da fà marchjà dritti tutti sti ribeddi à a Leghji Ripublicana ?

Ursule riflessi, è po, d’una mani assicurata, aprì a scatula di legnu posta nant’à u so scagnu. Ni cacciò a pistola di stu Babbu ch’eddu ùn avia cunnisciutu è s’ammirò u capu. Ind’a pezza, tutti si rinculoni spavintati, scappendu à dritta è à manca.

Orsu Antoni, calmu calmu à mezu à u cumbogliu, dichjarò d’una voci chjara l’ochji in l’ochju chì u filmava :

- Evviv’à Lotta !

Tirò, vindichendu u Babbu è sbarrazzendu a Ripublica d’un furisteru chì si piattava sott’à a casata d’Ursule Dupont. U so ciarbeddu doppiu fasciava i muri bianchi di u scagnu.

Erami l’ottu di maghju di u 2121.

Sin’ad oghji, sò pochi quiddi chì t’ani capitu stu fattu. For di mè è di voi ch’aveti lettu sta passata, ùn ci n’hè cà unu chì cunnosci a Virità. Si chjama Orsu si chjama, Orsu Pardiusantu, di Mora.
St’ottu di maghju, tuccava à eddu à tena alta a bandera Corsa à a cummimurazioni (sempri difesa) di a battaglia di u Ponti Novu è di u maceddu di u 2069. Cantava u populu u Dio vi salvi Regina ; a ghjenti adunita prigava par tutti i morti chì s’erani sacrificati da salvà una manera d’essa, di pinsà ch’ùn era quidda di l’altri omi di stu mondu. Un vechju barbibiancu, appusatu nant’à una panca, fighjulava a cirimonia, surridentu.

À Orsu, li scappava u pientu. Stu ghjornu quì era u più beddu di a so vita… era cugnumatu Lotta.


              



Dà leghje dinù

Heure H comme Haine - 10/10/2017

Haro sur la miss - 22/09/2017

Panique - 05/04/2017

Cœur de pierre - 12/03/2017

L'esprit des lois - 02/08/2016

Gordon Evans - 20/06/2016

Triptyque - 26/05/2016

Alice - 31/03/2016

Alep I love you - 18/09/2015

Je l'ai connu - 29/05/2015

Ponte Novu - 15/05/2015

1981 - 18/03/2015

Section 84 - 10/12/2014

​Armistice - 14/11/2014

Le passant - 25/10/2014

Ponte Novu - 17/10/2014

Le demi-pas - 23/09/2014

Mada et Veè - 05/09/2014

Neptudi - 24/07/2014

Commis d'office - 21/06/2014

Ultime étreinte - 16/06/2014

La Fée verte - 14/06/2014

Le sniper - 26/05/2014

Amour explosé - 20/04/2014

La mort de mon père - 02/04/2014

1 2 3

Negru | Rossu | Biancu | Ghjallu | Critica | Feuilleton




Anima Cappiata !

Torna altri rumpistacchi chì ci impuzzicanu incù i so testi, vulendu propiu esse letti per sperà ottene una qualunque gloria ch'elli ùn anu micca in a so vita viota è senza intaressu. Bon... forze chì ghje vera. Ma ci n'impippimu. È pò, a mi diciarete, bloghi litterarii, nant'à a tela, è sopra tuttu nant'à a tela corsa, ci n'hè ghjà à buzzeffa ! Tanti scrivanetti pumposi ! È bè tantu peghju ! O tantu megliu ! Hè solu una vitrina di più per fà scopre qualchi testi scritti, senza pritenzione, incù u core, incù e trippe, o incù e viscere chì vi cunveneranu...