Bloggu litterariu corsu

u 21 di Marzu 2014 - scrittu dà Francesco - lettu 427 volte

L’esiliatu

Un ringraziu particulare à Ghjuvan-Micheli Weber per u so aiutu.


Remak escì da a sò casetta. Era ùmidu è assai freta l’aria di a matina è à tempu, a nebbia abbucinava ogni cosa di u sò mantellu candidu.
Infrizzinitu, dicise di rientre subitu :
« Quandu duverebbenu ghjunghje i dui strangeri, issi Samak è Adok ? » disse Amiuk, a cumpagna.
« À a medità di u sicondu quartu, s’elli ùn anu persu a strada pè colpa di issa maladetta nebbia… »
In giru à elli, framente, u paisolu era in traccia di sveglia si è Amiuk disse :
« Tandu manca ancu pocu tempu… ghjust’à puntu, ùn t’anu micca dettu a raghjone di u scontru incù tè ch’elli anu dumandatu ? »
Remak rispose :
« Ùn sò micca, in veru : u missaghju chì annunziava u so arrivu hè ghjuntu da u mo amicu Garak, unu di i capimachja di u stirpugliu di e Cullette Turchine, è ùn dicia moltu… »
« Spergu ch’elli ùn saranu malati ? » Cuntinuonu Amiuk è Remak, aprendu e bracce.
« Un la sò micca, Amiuk… ma chì ai, mi pari inchieta… ci hè qualcosa chì ti primureghja. »
« Sicura, Remak, aghju un presentimentu è aghju paura per tè… s’elli fussinu malati puderebbenu fà corre un’epidemia nant’à u paisolu cum’ellu hè statu dece anni fà : quì ci hè 180 abitanti, cù i nostri figlioli à mezu… »
Remak fighjò a moglia è li rispose :
« Ai a raghjò, scuntreraghju i visitori for di u paisolu, accantu à u fiume è solu s’elli mi parenu sani, li purteraghju quì. »
« Grazie Remak, cusì và megliu. » Disse Amiuk, dendu li un basgiu.
« Avà sortu è vocu à scuntrà li, hè quasgi l’ora » Disse Remak, vestendu si incù u so pisiu mantellu ; a nebbia era per pisà si è u sole inguernale in fine principiava à riscaldà un pocu l’aria di i so raghji arancini.
Remak caminò versu u fiume chì scurria in fondu di a valle induv’ellu si truvava u paisolu è, percurrendu u camminu, scuntrò e donne chì eranu in traccia di cullà incù l’acqua appena pigliata.
Salutò à elle incù a manu è u surrisu po cuntinuò à camminà, capiciuttatu in i so penseri.
Oramai, amava issa ghjente primitiva è semplice chì, parechji anni nanzu, l’avianu accoltu cum’è unu di i soii, spartendu tuttu ciò ch’elli avianu. Quallà, avia trovu ellu in fine l’amore di una donna è s’era fattu una famiglia, cosa chì, per ellu suldatu di prufessione, era sempre statu cosa scunnisciuta.

Cù e so cunniscenze tecnulogiche è di scienza, aduprendu solu i scarsuli è primitivi medii ch'ellu avia trovu, era duvintatu u duttore d’issa cumunità è avia guadagnatu a so cunfidenza è u so rispettu, salvendu in tante uccasione dicine di vite umane.
Ma nimu, ancu a so moglia Amiuk, i so figlioli Reisak è a piccula Aniak, sapianu da veru quale ellu era in verità…
Tandu vide dui omi scunnisciuti chì cullavanu longu u stradellu à bon passu è li salutò di manera tradiziunale :
« Salute è longa vita, site voi Samak ed Adok ? »
U più vechju di i dui rispose :
« Salute è longa vita à tè… iè, simu noi ; Mi chjamu Adok è quessu hè Samak è tù, forse sì Remak di u paisolu di Amos, neh ? »
Remak feghjò attentu i dui omi : eranu vestuti cum’è l’abitanti di e muntagne. À u collu avianu una medaglia d’oru chì rapresentava u sole.
« Per piacè, venite cù me. » Disse à elli.
Cullonu torna à u paisolu induve, appena ghjunti, Remak insignò à i dui visitori a più capanna grande di u paisolu, quella di u Cunsigliu di l’Anziani. "
« Vinite, pusate è ditemi a mutivazione di a vostra visita… »

I trè omi pusonu intornu à a tola maiò chì occupava quasgi a pezza sana. U focu era accesu in u caminu cerchendu di mandà, senza tropu successu, un pocu di caldu è di chjarezza.
« Allora, cosa possu fà per voi ? »
I dui omi si feghjonu poi u più vechju, Adok, principiò à parlà :
« Vinimu da u paisolu di Likos, chì si trova à mezu à e Muntagne D’oru, à trè ghjorni di camminu da quì. Cinque ghjorni fà sò ghjunti à l’impruvisu visitori strangeri à bordu di una nave vulante è anu fattu un campu propiu vicinu à u nostru paisolu… »
Remak si chjinò in avanti, circhendu di piattà a so inchietutine.
- Cumu ? Visitori di una nave vulante !?? Per furtuna, anu fattu qualche attu nemichevule versu voi ?
- Innò, per furtuna, ma u so campu hè accintu da un muru chì pare fattu di luce è à traversu noi ùn pudimu vede ; eiu so u capimachja di u paisolu di Likos è aghju pensatu di vene à chjamà ti per avè u to parè : a mio ghjente hè sempre più inchieta è principia à avè tamanta paura.
- Mmmh, cumu pensate ch’o possu aiutà vi ?
- Tuttu u mondu sà chì tu sì statu trovu, 15 istati fà, feritu è unicu ancu vivu, trà i chjappuli di una nave vulante listessa à quista atterrata vicinu à noi. Forse cunosci tù issi strangeri, forse appartenenu à a to ghjente… ti precu di vene à u nostru paisolu chè tu possi andà à parlà incun elli… di sicuru, à tè, ùn facenu paura cum’è à noi…

Remak scapacciò a testa :
- Voi ùn pudite mancu imaginà quantu mondi esistenu in a Galassia è quant’elle sò e ghjente chì quallà campanu, puderebbenu esse di un populu ch’o ùn cunnoscu mancu appena…
- Remak, avemu a paura, a ti precu… aiuta ci…” disse Samak, chì finu a tandu ùn avia parlatu. »
- Remak u tagliò : “Va bè, veneraghju à parlà incun elli !
- O Remak, ti ringraziu assai.

Andò Remak à a so casetta à piglià qualcosa per u viaghju.
A moglia, Amiuk, ùn pruvò mancu una stonda à fà lu scambià idea ma disse solu, abbracciendu lu forte forte :
« Sia prudente, u m’amore. »

À capu à trè ghjorni di camminà, versu u paisolu di i dui strangeri, Remak si truvò davanti à unu straniu campu di quelli mai visti
« Voi aspettate quì, vocu à vede… » Disse à i cumpagni.
Remak s’avvicinò à a barriera chì circundava u campu militare di i visitori cù un perimetru di circa seicentu metri.
« Dev’esse un campu di forza assai putente… » Pinsò.
U campu di forza s’assumigliava à un spechju è rinviava a so imagine cumu s’ella tardavellava. « Ah ! Quista, pare l’intrata… »
Raghjunse un puntu induve, di a barriera, eranu visibule duie spezie di culonne di metallu, po briunò da fà si sente :
« Sò u Capitanu Remashkiad Wern Darmal di a Guardia Imperiale di a Pianetta Velassia ! Vogliu esse statu à sente ! »
D’un colpu, cum’è risposta, s’aprì un passaghju in a barriera di luce induve Remashkiad (u so veru nome, cum’era cunisciutu nantu à so pianetta natale) intrò.
Nentru à a barriera, eranu dicine di bastimenti chjuchi prefabbricati. Truvò à aspettà lu dui suldati, quasgi listessi à esseri umani, armati ma incù l’armi nentru à i stucci.
« Vinite incù noi, Capitanu, vi cunducimu nanzu à u culunellu Dokart. » Disse unu, parlendu incù un traduttore universale.
U culunellu Dokart era in traccia di parlà incù unu di i sò ufficiali suburdinati.

Quand’ellu ghjunse Remashkiad, u feghjò incù una strania sprissione, po disse :
« Ah, Capitanu Remashkiad Wern Darmal di a Guardia Imperiale di a Pianetta Velassia, benvenutu ! Dite mi ghjà : cumu vi possu aiutà ? »
Remash disse semplicemente :
« Sò vinutu quì, Culunellu, perché mi hè statu dumandatu da l’abitanti d’issa Pianetta : sò un populu primitivu, di ghjente semplice, è anu a paura di voi. Averanu a raghjò ? Dite mi, quale site è cosa site vinuti à fà qui ? »
Dokart fece un surrisu strettu palisendu duie filarate di denti fini assai è regulari.
« Và bè, andemu prestu à u seriu, vecu… Noi simu vinuti per piglià pussessione di a pianetta sana, à à nome di u guvernu nostru ! Oh, forse ci vulete fà capì chì vo cunsiderate sta pianetta parte di u territoriu di l’Imperu velassianu ? »
Remashkiad firmò stunatu di a rimarca, è tandu disse :
« Innò, innò, vogliu solu prutegge sta ghjente. Capite a cuntaminazione culturale è u spaventu chì vo avete datu a sta sucetà arcaica incù u vostru arrivu ? »
« U nostru arrivu ? È voi ? Ancu u fattu chì vo siate quì è u fattu chì vo avete palisatu a vostra vera identità, hè stata una cuntaminazione culturale ! »
Remash rispose prontu ma principiava à sente una inchietutine suttile chì li criscia nentru.
« Ma mi tuccava à fà la, o culunè, quand’e so falatu quì incù u mio astrunave, sta ghjente m’hà pigliatu per un diu, ma eiu quant’è voi, simu solu esseri umani cum’è elli !
- Falatu incù un astrunave, interessante… cumu hè finitu quì, capitanu ?
- Eramu in guerra incù un populu scunnisciutu è di quellu, noi, ùn sapiamu mancu l’apparenza è u nome ma l’aviamu cugnumatu “Selagart” vale à dì "i nemichi". Più di sedici anni fà, u nostru imperu fù attaccatu senza nisun pietà. Dopu, mentre una battaglia contru à un astrunave nemicu, u meiu fù culpitu è falò sopra à sta pianetta scunnisciuta…
- I vostri nemichi eranu i Wioorden…” disse u culunellu. Remashkiad ùn capì subitu.
- Cosa ?
- Aghju dettu chì u veru nome di stu populu in guerra incù voi era Wioorden, mi dispiace di dà vi una gattiva nutizia, capitanu, ma l’Imperu velassianu ùn esiste più !
- Cumu fate à sapè la ?
- Noi simu i Wioorden pensavamu di avè tumbatu unu à unu tutti i Velassiani, finu à oghje…
Remashkiad si sentì falà u mondu addossu
« Voi… »
Dokart surtì una pistola, u so surrisu era smaritu.
« Iè, noi… avà per fine avemu l’uccasione di finisce u nostru travagliu… vi ringraziemu d’esse vi prisentatu à noi ! »


              



Dà leghje dinù

Ritornu - 03/05/2017

Sagapo - 29/10/2016

Parapachja - 11/06/2016

Ballu di rime - 08/06/2016

Mondu - 09/05/2016

Microcosme - 19/04/2016

Tobby - 12/02/2016

Le net a disparu - 01/11/2015

Scontru - 04/03/2015

Démission - 11/02/2015

Deus ex machina - 08/02/2015

Parallèles - 15/01/2015

L'omu di Cagna - 11/12/2014

Bogue - 09/10/2014

Sourire blanc - 03/10/2014

Poésie - 01/10/2014

Nature Loving - 04/09/2014

Mise au vert - 28/08/2014

Au revoir Maurice - 18/08/2014

Sous son aile - 13/08/2014

Recherche - 18/07/2014

Vols en écaille - 02/07/2014

Chant d'étoiles - 19/06/2014

Vertigo - 15/05/2014

Cavernes - 29/03/2014

Id´île volcanique - 10/03/2014

1 2 3

Negru | Rossu | Biancu | Ghjallu | Critica | Feuilleton




Anima Cappiata !

Torna altri rumpistacchi chì ci impuzzicanu incù i so testi, vulendu propiu esse letti per sperà ottene una qualunque gloria ch'elli ùn anu micca in a so vita viota è senza intaressu. Bon... forze chì ghje vera. Ma ci n'impippimu. È pò, a mi diciarete, bloghi litterarii, nant'à a tela, è sopra tuttu nant'à a tela corsa, ci n'hè ghjà à buzzeffa ! Tanti scrivanetti pumposi ! È bè tantu peghju ! O tantu megliu ! Hè solu una vitrina di più per fà scopre qualchi testi scritti, senza pritenzione, incù u core, incù e trippe, o incù e viscere chì vi cunveneranu...