Bloggu litterariu corsu

u 25 di Marzu 2014 - scrittu dà - lettu 272 volte

Ghjuntu à l’ultimu


Ghjuntu à l’ultimu
A ghjenti po c’era ! Quattru milla parsoni, in sti tempi d’aduniti difesi, era un veru successu.
Antoni pigliò a parodda. Era un simbulu… era quiddu chì s’era rivultatu, era quiddu chì avia sacrificatu a so vita da libarà u so paesi. Ed oghji, era quiddu chì chjamava una volta di più à a rivolta.

« Cari amichi, caru Populu, oghji hè un ghjornu storicu. Femi ghjà u prima passu versu una Corsica libara. Semi stati sbagliati… emi purtatu à u puteri un omu troppu ambiziunutu. Eu, u puteri, ùn lu vuliu è ùn lu vogliu. Eddu u vulia hè ci hà sbagliatu. Ciò ch’eddu vulia, hè di furzà a ghjenti à pinsà com’è eddu. Si credi puru è ghjustu, voli chì no siami parfetti. Ma a parfizzioni ùn hè di stu mondu ! Si piglia par Danton è tumbarà tutti i soii, tutti quiddi chì riflettini è u poni piattà. Hè un scemu, à l’usu Pol Pot… Hà fattu di i nostri ziteddi un’ armata di scemi, senza cultura propia ma cù una cultura falsa di un populu sunniatu. Campa ind’u mitu è voli chì tuttu ugnunu ci campessi.
Aiò, dumandemi a so partenza, dumandemi l’alizzioni libari chì no miritemi… Emi fattu a guerra da essa libari è micca impastughjati, di ghjesti quant’è di paroddi. Ani fattu u so tempu sti falsi eroii, sti falsi prufetti chì ci prumettini un mondu novu, sempri rimissu à u dumani.
L’aghju fatta a guerra, a sapeti com’è mè. Ùn aghju mai circatu di piglià u puteri di u populu, ancu pà u populu. Ma oghji a dicu : basta cusì ! »

U discorsu ùn durò tantu chì a milizia s’affaccò minendu à tutti quiddi ch’ùn scappavani. Vechji, donni è ziteddi funi lampati in tarra è tribbiati com’è animali. U sangui schizzò…
Antoni scappò, micca ch’eddu t’avia a paura di a milizia ma parchì divintava un simbulu… u simbulu di a risistenza nova dopu d’essa statu quiddu di a risistenza vechja.

Si ni riintrì in casa soia po missi à piegna. Quarant’anni di lotta par ghjugna à sti punti stremi…

A moglia avia appruntatu a cena. Edda, s’era dighjà chjinata. Antoni magnò un pezzu di pani azimu po si chjinò senza pudè dorma.
Maria Matalena si vultò è l’invitò d’un surrisu. A notti fù calda malgradu l’addisperu. S’addurmintò i bracci in croci, a moglia contru.

Durmia sempri quand’eddu fù svigliatu Antoni da un fracassu tarribuli. A so porta era stata spundata è una milizia era intruta in forza. Ùn abbii mancu u tempu di passà un pantaloni, fù cacciatu da u lettu è lampatu in tarra… a moglia briunava di tarrori.
- Milizia Corsa Naziunali, ùn muviti un’arechja ! dissi u ghjuvanottu pistola in mani è elmu in capu.
- Francescu, sè tù ? O figliolu meu, chì faci ? dissi Antoni tinutu in tarra da quattru suldati.
- Seti in statu d’arristazioni, risposi u tippu.

A moglia piignia à più pudè, li mancava u soffiu…
- Andeti à vistì vi chì seti ridicula, aghjustò u ghjuvanottu.
- Francescu, u me figliuleddu, chì faci ? Semi i to ghjinitori… dissi a donna.
- Socu Capitanu di a Milizia Naziunali, facciu u me duveri arristendu un traditori !

Antoni fù strascinatu in tarra sin’à a vittura di a milizia. Avia capitu chì di parlà ùn ghjuvava à nudda. A cuscenza, facia un pezzu chì i ghjovani ùn l’aviani più… for di sta falza cuscenza di un populu sparsunalizatu. Ùn sappiani eddi chì un populu hè fattu d’individui sfarenti, di famigli liati o nò, d’intaressi particulari o cullittivi, d’idei, di vita !

C’erani dui stradi pussibuli : un populu libaru cù a ghjenti tinuta o un populu tinutu cù l’omi libari. U prisidenti di a ghjovana Ripublica di Corsica avia sceltu a prima chì era dinò quidda di i so intaressi parsunali. Puteri è purezza… ciò chì porta ugnunu à u fascisimu.

Antoni fù lampatu in prighjò po, u lindumani da mani, fù purtatu ind’una gabbia ind’a sala di u palazzu di ghjustizia. Aspittava…


U purtoni di u Palazzu di ghjustizia s’aprì. Intria l’aghjenti chì u fighjulavani in catarochju. Qualchì volta si sintia un brionu scemu : « Traditori ! »… « Tumbeti lu ! ».

Eddu un traditori… ciò chì ci vulia à senta ! Hè vera chì Cristu era statu tombu da i soii.
« A corti spiciali ! »

Tuttu u mondu si pisò for di Antoni… si n’impippava di a corti è di u so prisidenti… a so sorti era scritta. Fù pisatu di forza da dui suldati… li stuppò in faccia. Fù tandu minatu di pugni è di calci po ripusatu nant’à u so bancu.
- Antoni Leca, cunnisciti i fatti chì vi sò rimpruvarati ?
- Mancu appena, risposi.
- Seti ghjudicatu ch’aveti traditu u vostru populu.
- Seti voi i traditori, mansa di surpadori ! Eu, mi socu battutu a me vita sana pà a Libartà di i mei, micca par voi chì seti mancu un omu… vigliaccu, pratinziunutu, fascistu, razzistu… t’aveti tutti i difetti di a criazioni !

I mughji si faciani più forti : «a morti pà u traditori, a morti ! »
- Ùn ricunnoscu mancu appena sta corti di merda, sottumissa à u puteri puliticu. Induva s’hè vista una corti cù u prisidenti di a Ripublica in prisidenti di Tribunali ? Chì vo scump…
Un pugnu nant’à a bocca u feci tacia.
Si ripisò subbitu.
- Mineti mi nant’à bocca è scrivaraghju, taglieti mi i diti è minaraghju di capu….

U suldatu di dritta u minò di bastoni in capu. Si svigliò in prighjò. U prucessu si passava fora di a so prisenza. Di tutta manera, cunniscia a so sorti. Nasci l’omu, nasci u distinu ! U soiu era di mora in traditori. Pagava a so andatura troppu dritta.
U ghjuratu ùn firmò tantu à dilibarà. Era un carnavali di prucessu.
Fù cundannatu ad essa fucilatu subbitu subbitu, sottu à l’evvivi di u bravu populu.

"Hè ora !" dissi u ghjuvanottu chì accesi u lumi è aprì a porta di a prighjoni. Hè ora… dui paroddi soli da dì li "Addiu !". Ùn ci era nimu da salutà lu da veru, da strigna lu, da basgià lu. Eddu chì avia datu tant’amori à l’altri ùn ni ricivia una goccia… I suldati s’erani spiccati da una lotta chì era stata soia nanzu… quand’era ? arimani ? È sti mirdosi ch’eddu avia furmatu eddu è chì avà u vuliani tumbà. I cunniscia tutti quant’à i so famigli… Da l’altru cantu di a corti, c’era un omu d’andatura è di statura cunnisciuta : u so propiu figliolu !

Comu erani ghjunti à sti stremi ?
Tutta a so vita li passava in capu… a so ghjuvintù in paesi, i so primi amori, l’amori di i so ghjinitori, l’amori di a so patria. U pagava avà, st’amori purtatu à u paesi. Avali, a so vita quì era par finiscia. Chì pesu t’avia a salvezza di i so tradizioni, di a so cultura propia, di tutti sti tuntii ?
Ùn valia micca più cà st’affari a vita d’un omu ?
Pisò u capu da veda sottu à u mandili chì i suldati l’aviani missu nant’à l’ochji. Vulia veda a so morti in faccia.

Ùn sintì a padda chì li sdrughjia u cori. Cumminciò tandu una vita aterna… in altrò.
Calendu u fucili, u figliolu ùn piensi mancu… avia sbarrazzatu a Patria d’un traditori.


              



Dà leghje dinù

Heure H comme Haine - 10/10/2017

Haro sur la miss - 22/09/2017

Panique - 05/04/2017

Cœur de pierre - 12/03/2017

L'esprit des lois - 02/08/2016

Gordon Evans - 20/06/2016

Triptyque - 26/05/2016

Alice - 31/03/2016

Alep I love you - 18/09/2015

Je l'ai connu - 29/05/2015

Ponte Novu - 15/05/2015

1981 - 18/03/2015

Section 84 - 10/12/2014

​Armistice - 14/11/2014

Le passant - 25/10/2014

Ponte Novu - 17/10/2014

Le demi-pas - 23/09/2014

Mada et Veè - 05/09/2014

Neptudi - 24/07/2014

Commis d'office - 21/06/2014

Ultime étreinte - 16/06/2014

La Fée verte - 14/06/2014

Le sniper - 26/05/2014

Amour explosé - 20/04/2014

La mort de mon père - 02/04/2014

Ursule Dupont - 01/04/2014

1 2 3

Negru | Rossu | Biancu | Ghjallu | Critica | Feuilleton




Anima Cappiata !

Torna altri rumpistacchi chì ci impuzzicanu incù i so testi, vulendu propiu esse letti per sperà ottene una qualunque gloria ch'elli ùn anu micca in a so vita viota è senza intaressu. Bon... forze chì ghje vera. Ma ci n'impippimu. È pò, a mi diciarete, bloghi litterarii, nant'à a tela, è sopra tuttu nant'à a tela corsa, ci n'hè ghjà à buzzeffa ! Tanti scrivanetti pumposi ! È bè tantu peghju ! O tantu megliu ! Hè solu una vitrina di più per fà scopre qualchi testi scritti, senza pritenzione, incù u core, incù e trippe, o incù e viscere chì vi cunveneranu...